حلوييييييات

عدد الرسائل : 107 تاريخ التسجيل : 28/02/2008

نتمنى يعجبوكم

هادو الشكيلات لي قدمت في الأول كبوفي buffet

هادي حلوة الحامض citron

تاخذي الشكلاط الابيض وتدوبيه وتعملي معة شوية دالملون الاصفر وشوية د روح الحامض او شوية قشرة الحامض محكوكة وتصبيه في قوالب على شكل الحامض وتوضعيها حتى تتجمد وتزوليها.

و هادي حلوة الترفاس les truffes

250غ شكلاط أسود. 250غ كريم فريش. قبصة القرفة . قبصة سكينجبير و قبصة جوزة الطيب(الكوزة).
للتزيين الشكلاط الأسود ( من الأحسن chocolat de couverture). بودرة الكاكاو.
توضعي الكريم فريش في كسرولة مباشرة فوق النار ماشي في حمام مريم حتى تسخن جيدا. نوضع الشكلاط مقطع طريفات صغيرة(باش يذوب بسهولة) في اناء آخر ونصب فوقه الكريم فريش لي تكون سخنت جيدا( ضروري نبدل الاناء حيت الاناء الاول يمون ساخن ويقدر يحرق لنا الشكلاط في القعر ديالو) ونطربهم بملعقة العود حتى يدوب الشكلاط وعاد نضيف له قبصة من القرفة والكوزةوسكينجبير ونوضع الخليط في اناء واسع شوية ونخليه حتى يبدا يبرد شوية ويقبط فراسو نعمل (les gants) ونكور الخليط ونغمسه في الشكلاط الأسود ديال التزيين نكون دوبناه تم نمررهم في بودرة الكاكاو. ممكن كذلك نعمله في قوالب باش نسهل الخدمة ولما تجمد نزولها ونعملها في الشكلاط المدوب تم بودرة الكاكاو.

وهادا البراليني

مقادير العجين سابلي (la pâte sablée):
250غ دقيق. 125غ زبدة. قبصة الملح. ملعقة كبيرة سكر سنيدة. 1 أصفربيضة.
نخدم الدقيق مع الزبدة برؤوس الأصابع حتى تترمل ثم نضيف الملح والسنيدة ونخدمهم مزيان ونضيف أصفر البيضة الا تجمعو مزيان الابقات مفتتة نضيف 1ملعقة ولا 2 د الماء بارد نجمعها ونعملها فالثلاجة مدة30 دقيقة
لما نخرجها نسرحها بالدلاك ونوضعها في قوالب انا عملتها في قوالب على شكل باطو(barquettes) ونتكها بالشوكة ونطيبها لما نخرجها نخليها تبرد.
بالنسبة للبراليني
ناخد 250غ لوز بقشرته نمسحه بمنديل نظيف ونحمره ونطحنه وهو مازال سخون مع 250غ سكر سنيدة حتى يتعلك
ناخد الباطو لي طيبنا ونعمل فيهم البراليني بواسطة ملعقة ولا كيس الحلواني. ندوب شوية الشكلاط الاسود ونعمله في كورني من ورق سيلفيريزي ونمرره فوق البراليني.
بالنسبة لحلوة السابلي
نفس مقادير عجينة السابقة لما نخرجها من الثلاجة نمددها بالدلاك ونقطعها بقطاعة مدورة ومشنفة من الجناب ونتكها بالشوكة وندخلها تطيب.
الكراميل عملت نستلي مركز حلو طيبتو في الكوكوت ثم عملته في كيس الحلواني وخرجته على شكل وريدات فوق السابلي وزينته بالشكلاط الأبيض بواسطة كورني ورق سيلفيريزي

وهادي حلوة السابلي بالكراميل

--------------------------------------------------------------------------------

هادو طرطات صغيرة بعجينة الجينواز والكريم بتسيير بالبراليني

مقادير عجينة الجينواز: 80غ دقيق. 120غ سكر سنيدة. 4 البيضات. 1 خميرة الحلوة(بايكينج باودر). قبصة الملح.80غ بودرة الكاكاو.
طربي البيض مع السنيدة بالطراب الكهبائي حتى يولي الخليط ابيض وخفيف وغربلي فوقه الدقيق مخلط مع الكاكاو والملح والخميرة وخلطي دابا غير بملعقة خشبية وصبي الخليط فوق طاوة الفرن مغطية بورق سيلفيريزي وندخلها تطيب في فرن حرارته متوسطة لمدة 10 دقائق. لما تطيب نخليها تبرد جيدا ثم نقطعها بقطاعة الحلوى شكلها دائري .
مقادير الكريم بتسيير: 4 اصفر البيض. 60غ سكر سنيدة. 2فاني (فانيلا). 80غ نشا(اودقيق). نصف لتر حليب.
نوضع الحليب يغلي مع 1 فاني. في اناء نطرب اصفر البيض مع 1 فاني والسنيدة ونضيف لهم النشا ونطربهم جيدا. لما يغلى الحليب نضيفه للخليط الاول ونرجعة للكسرولة فوق نار مهيلة مع التحريك المستمر حتى يخثر ونضيف له البراليني (انا كان بقي لي من حلوة الباطو بالبراليني) ونخلط جيدا نوضع الكريمة فوق دوائر الجينواز اللي قطعنا ثم نزينها بفواكه مشكلة (انا زينتها بالأنناس و الكيوي والبنان وحب الملوك) وندهنها في الأخير بالنباج او الكونفتير مسخن مع شوية الماء فوق نار مهيلة.

وهادي ميني بيتزا

بالنسبة للعجين 250غ دقيق. 1 بيضة. 2 او3 ملاعق كبار زيت الزيتون. شوية الخميرة معجونة(دالخبز). الملح. شوية الزعتر. 2 ملاعق كبار حليب بودرة. وتعجن بالماء الدافئ نتركها حتى تخمر جيدا عاد نضربها باش يخرج منها الهواء نمددها بالدلاك ونوضعها في قوالب البيتزا الصغيرة(قوالب الطارطوليت الصغيرة) نتكها بالشوكة ونطيبها.
بالنسبة للحسوة عادية: صلصة طماطم كنعمل فيها مطيشة طرية محكوكة+ م.ك. مطيشة الحك+ الملح+التحميرة+ البزار+الكمون+الخرقوم البلدي+وريقات سيدنا موسى ونخليها حتى تنشف مزياااااااااااان. نسرح هاد الصلصة فوق البيتزا لي نكون طيبتها ونزينها حسب الرغبة هادي عملت فيها الكفتة( لي شحرت مع شوية الملح والبزار) ورشيتها بشوية الزعتر والفروماج وخويط دزيت الزيتون.ونرجعها للفرن جهة الشواية غير تتحمر من الوجه .
** ممكن تعملي فيها الدجاج المشحر او الحوت او فواكه البحر حسب الموجود.

هادي بسطيلة د الحوت وفواكه البحر

ورقة البسطيلة. حوت ابيض مسلوق مع شوية الملح وطريف الحامض ووريقات سيدنا موسى ومنقي من الشوك . الكروفيت والكلمار مسلوقين مع الملح والحامض ووريقات سيدنا موسى. الشعرية الصينية مغطوسة مدة 2 دقائق في الماء الغليان. الزيتون الأخضر مقطع حلقات.
نخلط الحوت وفواكه البحر والشعرية والزيتون والهريسة الحارة والتحميرة والبزار والملح( بالقياس ) والكمون والخرقوم البلدي وشوية زيت الزيتون وعصير الحامض و لب وقشرة نصف حامضة مرقدة مقطعين صغاااااار ونخلط الكل ونعمر به ورقة البسطيلة اما بسيطلات فردية صغيرة او بسطيلة عائلية كبيرة (انا عملتهم صغار) وندخلهم للفرن يطيبوا ولما نخرجهم عملي فوق الوجه الفروماج محكوك او لا خليهم هاكداك وزينيهم بطريف الحامض باش تعرفيهم مالحين.

وهادو بسيطلات بالدجاج

نصبتك الدجاج بالملح والزيت البلدية والزيت الرومية والبزار والخرقوم البلدي والملح وسكينجبيروالسمن والقزبر والمعدنوس مقطعين وبصيلة مشلدة ونطيبوه ولما يطيب نزول الدجاج ونزيد البصلة والقرفة والزبيب وملعقة سنيدة ونخليه حتى تتعسل البصلة ويوقف المرق. الدجاج لما يبرد نزول له العظام ونحتفظ باللحم. نسلق اللوز ونقشرة ونحمره اما في الفرن او نقليه في الزيت ونهرمشه ونضيف له شوية القرفة والسنيدة ونتركه جانبا. نسلق البيض ونقشره ونقطعة طريفات صغيرة ونضيف له شوية المرق وقبصة الملح (ممكن فاش تزولي الدجاج وقبل ماضيفي البصلة والزبيب تاخدي شوية من المرق وطيبي فيه البيض على شكل اومليت.
لما يوجد كلشي نعمل بسيطلات صغيرة بهاد الحشوة وورقة البسطيلة كيف العادة ونلصقها باصفر البيض ثم نوضع فوقها طريفات الزبدة وندخلها للفرن تطيب وتتحمر. لما تطيب نزينها بالقرفة والسكر كلاصي.